Asiyada istehlak yavaşlayır, ticarət zəifləyir: Yaponiya və Çin iqtisadi siqnallar verir

Yaponiyada sentyabr ayında şəxsi xərclər illik müqayisədə cəmi 1.8% artıb və bu, bazar gözləntiləri olan 2.5%-lik göstəricidən xeyli aşağıdır. Ölkədə istehlak artıq ardıcıl beş aydır yüksəlməsinə baxmayaraq, artım tempi zəifləyib. Ən kəskin yavaşlama nəqliyyat və rabitə xərclərində (11.5% - avqustda 13.5%-ə qarşı) və mədəniyyət-rekreasiya sahəsində (6.4% - avqustda 12.2%-ə qarşı) müşahidə olunub. Əvəzində, tibb xərcləri 11,.%-lik artımla son illərin ən güclü sıçrayışını göstərib, mebel və ev əşyalarına yönələn xərclər isə mənfidən (−6.8%) cüzi müsbət səviyyəyə (0.5%) keçib. Aylıq müqayisədə isə xərclər 0.7% azalıb və bu, son üç ayda ilk geriləmədir.

Tokio birjaları Wall Street dalğasından təsirləndi

Yaponiyanın əsas indeksləri cümə günü enişlə bağlanıb: Nikkei 225 indeksi 1.3% azalaraq 50220 səviyyəsinə, Topix isə 0.5% geriləyərək 3297 punkta düşüb. ABŞ-da süni zəka səhmlərinin dəyər itirməsi Asiya bazarlarına da mənfi təsir göstərib. SoftBank Group 7.6%, Advantest 6.4% dəyər itirib, texnologiya sektorunun zəifləməsi istehsal və istehlakçı şirkətlərini də arxasınca aparıb. Mitsubishi Heavy Industries (-2.4%), Ajinomoto (-2.5%) və Sanrio (-1.1%) kimi şirkətlər də itkilərlə günü tamamlayıb. Həftəlik baxımdan, Nikkei 4%, Topix isə təxminən 1% dəyər itirib.

Çin ixracı sürpriz enişlə investorları təəccübləndirdi

Çində oktyabr ayında ixrac gözlənilmədən 1.1% azalıb və səkkiz ayın ən aşağı səviyyəsinə — 305.4 milyard dollara düşüb. Bazar proqnozları 3%-lik artım gözləsə də, ABŞ ilə ticarət gərginliyi və “Golden Week” tətili ixracat tempini zəiflətdi. Bu, fevraldan bəri ilk azalma olub. Üstəlik, ABŞ-a ixrac 17.8% kəskin azalıb, halbuki ASEAN ölkələrinə (+14.3%) və Avropa İttifaqına (+4%) göndərişlər artıb. İdxal isə cəmi 4 aylıq minimuma enərək zəif artım tempi göstərib. Bununla belə, ilin əvvəlindən bəri Çin ixracı ümumilikdə 5.3% artaraq 3.08 trilyon dollara çatıb.

Asiya bazarlarında ikili siqnal: Zəifləyən tələbat, diqqətli investor

Həm Yaponiyada, həm də Çində istehlak və ticarət göstəricilərinin zəifləməsi regionda iqtisadi bərpanın hələ tam dayanıqlı olmadığını göstərir. Yaponiyada istehlakın azalması daxili inflyasiya və real gəlirlərin sıxılmasının təsirini, Çində ixracın düşməsi isə xarici tələbin soyumasını əks etdirir.

Texniki baxımdan, Nikkei 225 indeksi 50000 səviyyəsi ətrafında güclü dəstək zonası yaradır — bu səviyyənin aşağısında eniş 48500-ə qədər dərinləşə bilər. ABŞ bazarlarında texnoloji bərpa başlasa, indekslərdə növbəti mərhələdə 51000–51500 aralığında qısamüddətli yüksəliş mümkündür. Fundamental mənzərə isə daha ehtiyatlı qalır: Yaponiyada zəif istehlak artımı və Çində ticarət tempinin enməsi Asiya üçün yaxın aylarda orta templə, lakin dəyişkən iqtisadi dinamika proqnozlaşdırır.