Microsoft yenidən zirvədə: Bulud imperiyasının rəqəmlərlə hekayəsi

"Microsoft"-un son maliyyə göstəriciləri onu texnologiya sektorunda sabit və gəlirli lider kimi bir daha ön plana çıxarır. Şirkətin ümumi aktivləri 636.35 milyard dollar, bazar kapitallaşması isə 3.81 trilyon dollar təşkil edir. Bu, onu "Apple"-dan sonra dünyanın ikinci ən dəyərli şirkəti səviyyəsində saxlayır.

Maliyyə baxımından Microsoft balanslı struktura malikdir: cari aktivlər 189.07 milyard dollar, cari öhdəliklər isə 135 milyard dollar. Yəni şirkət likvid baxımdan güclü mövqedədir (current ratio ≈ 1.4). Bu, onun qısamüddətli öhdəliklərini problemsiz qarşılaya biləcəyini göstərir.

Yüksək səmərəlilik və az risk

"Microsoft"-un xalis gəliri 27.75 milyard dollar, faiz və vergi öncəsi mənfəət (EBIT) 37,96 milyard, faiz, vergi və amortizasiya öncəsi mənfəət (EBITDA) isə 51.02 milyard dollardır. Bu rəqəmlər göstərir ki, şirkət əməliyyat baxımından çox effektiv işləyir. Ümumi satış gəliri 77.7 milyard, ümumi mənfəət isə 53.63 milyard dollar səviyyəsindədir – yəni ümumi mənfəət marjası 69%, bu da sektorun ən yüksək göstəricilərindən biridir.

Şirkətin borc yükü 97.64 milyard, faiz xərcləri isə cəmi 698 milyon dollardır. Maraqlı məqam odur ki, faiz gəliri (769 milyon) xərcləri üstələyir — bu da "Microsoft"-un maliyyə risklərinin minimal səviyyədə olduğunu sübut edir. Üstəlik, öz kapitalı 363 milyard dollar olmaqla, şirkət balansında sağlam kapital strukturu saxlayır.

Qiymət və gəlir: İnvestor inamı davam edir

"Microsoft"-un səhm başına gəliri (EPS) 4.13 dollardır, Qiymət–Gəlir nisbəti (P/E) əmsalı isə 36.92. Yəni investorlar hər 1 dollarlıq qazanc üçün 36 dollar ödəməyə hazırdır. Bu, bazarın "Microsoft"-un gələcək artım perspektivlərinə böyük inam bəslədiyini göstərir.

Dividend gəlirliliyi 0.66% səviyyəsindədir – "Apple"-dan bir qədər yüksək, amma hələ də “böyümə yönümlü” şirkət obrazına uyğundur. 228 min əməkdaşı ilə Microsoft təkcə texnologiya deyil, həm də iqtisadi dayanıqlığın simvoluna çevrilib.

Süni zəka və bulud: Növbəti sıçrayışın mərhələsi

Microsoft artıq klassik proqram təminatı dövrünü arxada qoyub və bulud infrastrukturu (Azure), süni zəka və OpenAI ilə inteqrasiya kimi yeni istiqamətlərlə gələcəyini formalaşdırır. Bu sektorlar həm əməliyyat gəlirini, həm də bazar payını artırır. Şirkətin operativ mənfəət marjası təxminən 49% olduğu üçün hər bir əlavə satış birbaşa mənfəətə çevrilir.

Buna baxmayaraq, analitiklər bildirir ki, "Microsoft"-un P/E nisbəti bir qədər yüksək olduğundan səhm qiymətlərində qısamüddətli korreksiya (düzəliş) baş verə bilər. Amma uzunmüddətli baxışda, bulud xidmətlərinə və AI ekosisteminə olan tələbin artması sabit artım trendini dəstəkləyəcək.

Gələcəyin kodunu yazan şirkət

Microsoft bu gün təkcə proqram təminatı istehsalçısı deyil, qlobal texnoloji infrastrukturun dayaqlarından biridir. Rəqəmlər göstərir ki, o, həm maliyyə, həm də strateji baxımdan mükəmməl tarazlıq qurmağı bacarıb.

Əgər Apple innovasiyanın “emosional” tərəfini təmsil edirsə, Microsoft onun “ağıl və sistem” tərəfidir. 

Buludlar üzərində qurulan bu imperiya hələ uzun müddət rəqəmsal dünyanın mərkəzində hökmranlıq edəcək.