Neft “dayanacaq siqnalı”: OPEC+ planı da qiymətləri dayandıra bilmədi

Dörd günlük artımdan sonra neft bazarında yenidən eniş müşahidə olunur. Çərşənbə axşamı WTI markalı xam neftin bir barel fyuçers qiyməti 60.8 dollar səviyyəsinə düşüb. Qiymətlərin azalması OPEC+ ölkələrinin hasilat artımlarını gələn ilin əvvəlində dayandırmaq qərarına baxmayaraq, bazarda artıq təkliflə bağlı narahatlıqların davam etdiyini göstərir. 

Təchizat riskləri: Siyasət və müharibə faktorları

Buna baxmayaraq, bəzi risklər qiymətlərin daha da enməsinin qarşısını alır. ABŞ-ın Rusiyanın Rosneft və Lukoil şirkətlərinə qarşı sanksiyaları sərtləşdirməsi, həmçinin Ukraynanın Tuapse limanında Rosneft zavoduna dron hücumu enerji təchizatında gərginlik yaradır. Hadisə nəticəsində bir tanker alovlanıb, bir neçə yükləmə terminalı fəaliyyətini dayandırıb. Bu kimi hadisələr bazarda siyasi və təhlükəsizlik risklərinin hələ də canlı olduğunu göstərir.

Gələcəyə baxış: Balans axtarışı davam edir

Hazırda neft qiymətləri üçün vəziyyət ikili istiqamətdə dəyişir — təklif artımı ucuzlaşma təzyiqi yaradır, lakin geosiyasi risklər və sanksiyalar qiymətlərin kəskin düşməsinin qarşısını alır. İqtisaçdılar hesab edir ki, qlobal enerji bazarı 2026-cı ilin ilk yarısında artıq təklifi daha aydın hiss edə bilər. Hələlik isə OPEC+ üçün əsas məqsəd, sakit, amma nəzarət altında bazar mühiti saxlamaqdır.

Bazar sakit deyil, sadəcə ehtiyatlı

Neft qiymətlərinin 60 dollar ətrafında qərarlaşması qlobal enerji sektorunda “qısa fasilə” kimi görünür. Həm hasilat siyasəti, həm də geosiyasi risklər balansı dəyişdirməyə qadirdir. Bir sözlə, OPEC+ fasilə verir, amma bazar hələ nəfəs almır — çünki hər yeni hadisə neftin istiqamətini yenidən dəyişə bilər.