ABŞ sənaye mühərriki zəifləyir: İstehsal sektoru səkkizinci ayda da daralır

ABŞ-ın istehsal sektoru hələ də toparlana bilmir. İstehsal Menecerləri İnstitutu (ISM) tərəfindən açıqlanan oktyabr 2025 məlumatlarına görə, İstehsal PMI indeksi 48.7-yə enib, sentyabrda qeydə alınan 49.1 səviyyəsindən və bazar gözləntiləri olan 49.5-dən aşağı nəticə göstərib. Bu göstərici ABŞ sənayesinin ardıcıl səkkizinci ayda da daraldığını təsdiqləyir və iqtisadi aktivlikdəki zəifliyin hələ də davam etdiyini ortaya qoyur. 

Əmək bazarında durğunluq, qiymət təzyiqləri azalır

İstehsal sektorunda məşğulluq indeksi 46 punkt səviyyəsində qalaraq, azalma tendensiyasını davam etdirib. Sorğuda iştirak edən şirkətlərin 67%-i hələ də işçi sayını azaltmaqla məşğuldur, yeni işə qəbul isə nadir hal sayılır. Bununla yanaşı, qiymət təzyiqləri bir qədər yumşalıb – qiymət indeksi 61.9-dan 58-ə enib. Bu, inflyasiyanın müəyyən qədər nəzarət altına alındığını göstərsə də, tələbin zəifləməsi fonunda gəlirliliyə təzyiq artır.

Tədarük zənciri yavaşlayır, sektorun iki dayağı qalır

Tədarükçü çatdırılma indeksi də 54.2-yə yüksələrək üçüncü ay ardıcıl olaraq gecikmələrin davam etdiyini göstərib. Bununla belə, ümumi sənaye mənzərəsi hələ də zəifdir. ISM-in rəhbəri Süzan Spensin sözlərinə görə, altı əsas sənaye sahəsindən yalnız ikisi – Qida, içki və tütün məhsulları ilə nəqliyyat avadanlıqları – oktyabrda genişlənmə nümayiş etdirib. Digər bütün sahələrdə daralma davam edir.

Sənaye “soyuq mövsümə” qədəm qoyur

Son göstəricilər ABŞ istehsal sektorunun yenidən riskli mərhələyə daxil olduğunu göstərir. İnflyasiya təzyiqlərinin azalması müsbət siqnal sayılsa da, azalan sifarişlər və zəif məşğulluq bazarı iqtisadi artımı ləngidir. Analitiklər bildirir ki, yaxın aylarda sənaye siyasətinin dəstək tədbirləri və maliyyə stimulları olmadan sektorda canlanma çətin görünür.

Başqa sözlə, ABŞ istehsalının mühərriki hələ də işə düşmək üçün “yeni yanacağa” ehtiyac duyur.