Dollar indeksində tərəddüd: siyasət böhranı və zəif məşğulluq bazarı

Dollar indeksi son iki sessiyadakı ucuzlaşmadan sonra çərşənbə axşamı 98 punktun ətrafında tərəddüd edir. ABŞ-da federal hökumətin maliyyələşdirilmə müddəti 1 oktyabrda başa çatır və yeni büdcə razılaşması əldə olunmasa, hökumət bağlanması (shutdown) riski reallaşa bilər. Prezident Donald Trampın Konqresdə keçici xərcləmə paketi üçün opponentlərlə razılaşmaqda uğursuzluğu vəziyyəti daha da mürəkkəbləşdirib. Bu ssenari həftə ərzində dərc olunmalı olan mühüm statistik göstəricilərin, o cümlədən məşğulluq hesabatlarının gecikməsinə səbəb ola bilər. 

Texniki və fundamental proqnoz

Texniki baxımdan dollar indeksi 98 dəstəyinin üzərində dayanıqlılığını qorusa, 98.5 və 99 punkta doğru qısamüddətli bərpa mümkün görünür. Lakin şatdaun riski reallaşarsa və məşğulluq göstəriciləri zəif açıqlanarsa, indeksin 97.5 və hətta 97 səviyyəsinə geri çəkilməsi ehtimalı güclənəcək. Fundamental tərəfdən Fed-in əlavə faiz endirimi ehtimalları dolların güclənməsini məhdudlaşdırır. Digər tərəfdən, əgər əmək bazarı gözləniləndən güclü nəticələr versə və hökumət böhranı aradan qaldırılsa, indeksin 99 bəndinə doğru hərəkəti üçün imkanlar artacaq.

Qeyri-müəyyənliyin kölgəsində dollar

Hazırda dollar indeksi siyasi və iqtisadi qeyri-müəyyənliklərin kəsişməsində dayanıb. Hökumət bağlanması ehtimalı investorları ehtiyatlı davranmağa vadar edir, zəif məşğulluq əlamətləri isə Fed-in pul siyasətini daha da yumşaltmaq zərurətini gündəmə gətirir. Gələcək günlərdə açıqlanacaq NFP və digər göstəricilər dolların yaxın perspektivdə istiqamətini müəyyən edəcək əsas həlledici faktor olacaq.