Embedded Files
Avro oktyabrın ortalarından bəri ən zəif səviyyəsinə — 1.16 dolların altına enib. Bunun əsas səbəbi ABŞ Federal Ehtiyat Sisteminin (FED) gözlənildiyi kimi uçot dərəcəsini 0.25%i azaltması, lakin sədr Jerom Povelin ilin qalan hissəsində yeni azalma ehtimalını zəif göstərməsidir. Bu açıqlama dolların qlobal bazarlarda güclənməsinə səbəb olub. Digər tərəfdən, Avropa Mərkəzi Bankının (AMB) oktyabrın 30-da keçiriləcək iclasda dərəcələri ardıcıl üçüncü dəfə sabit saxlayacağı gözlənilir. 2025-ci ildə də monetar siyasətin dəyişməyəcəyi proqnozlaşdırılır. Avrozonada inflyasiya sentyabrda 2.2 faizə yüksəlib, bu da əvvəlki üç ayda qeydə alınan 2.0 faizlik göstəricidən bir qədər yüksəkdir. ÜDM isə ilin üçüncü rübündə 0.1 faiz artaraq əvvəlki dövrlə eyni templə irəliləyib.
Funt sterlinq üçün çətin həftə
İngiltərə funtu da bu həftə dollar qarşısında zəifləyərək 1.32 dolların altına enib – bu, apreldən ən aşağı səviyyədir. FED-in qərarı fonunda dollara tələbin artması ilə yanaşı, Britaniyada daxili iqtisadi narahatlıqlar da valyutanın təzyiq altında qalmasına səbəb olur. Bazarlarda İngiltərə Bankının yaxın aylarda faiz endirimi ehtimalı artır. Bundan əlavə, noyabr büdcəsinin iqtisadi artıma mənfi təsir göstərəcəyi gözlənilir. Baş nazir Keir Starmer parlamentdə gəlir vergisi, sosial sığorta və əlavə dəyər vergisi artımlarını istisna etməyib. Büdcə Məsuliyyəti Ofisinin məhsuldarlıq artım proqnozunu 0.3 faiz azaltması isə 20 milyard funt sterlinqlik fiskal boşluq yarada bilər. Yumşaq inflyasiya göstəriciləri də monetar siyasətdə yumşalmanın yaxınlaşdığına işarə edir.
Yapon yeni gözləmə mövqeyində
Yapon yeni cümə axşamı günü 1 dollara görə 152.5 səviyyəsində sabit qalıb. İnvestorlar Yaponiya Bankının yeni qərarını gözləyir və çoxları dərəcələrin dəyişməz qalacağına inanır. Lakin daxili inflyasiyanın artması və tarif təzyiqlərinin azalması fonunda gələcəkdə faiz artımlarının bərpa olunması müzakirə mövzusudur. Yeni seçilmiş baş nazir Sanae Takaiçi isə ənənəvi olaraq yumşaq monetar siyasətin tərəfdarı kimi tanınır. Çərşənbə günü yenin zəifləməsi də dolların FED qərarı sonrası möhkəmlənməsi ilə bağlı olub.
EURUSD məzənnəsi (Saatlıq qrafikl)
GBPUSD məzənnəsi (Saatlıq qrafikl)
USDJPY məzənnəsi (Saatlıq qrafikl)
Gələcək istiqamət: Dolların hökmranlığı müəmması
Hazırda valyuta bazarlarında əsas diqqət dolların gücünü qoruyub-qoruyamayacağına yönəlib. Fundamental göstəricilər göstərir ki, ABŞ iqtisadiyyatı hələ də nisbətən dayanıqlıdır, inflyasiya nəzarət altındadır və FED ehtiyatlı davranır. Bu isə qısamüddətli perspektivdə dolların güclü qalmasına şərait yaradır.
Texniki baxımdan avro üçün 1.1550 və 1.1450 səviyyələri əsas dəstək zonaları kimi görünür. Bu səviyyələr qorunmasa, 1.13 istiqaməti gündəmə gələ bilər. Funtda 1.31–1.30 aralığı həlledici zonadır: bu səviyyənin altına enmə sterlinqin daha dərin itkilər yaşamasına yol aça bilər. Yapon yeni isə 153 səviyyəsini keçərsə, hökumətin və mərkəzi bankın valyuta müdaxiləsi riski artacaq.
Ümumilikdə, yaxın aylarda qlobal valyuta bazarları üçün əsas ssenari dolların nisbətən güclü qalması və digər əsas valyutaların bu təzyiqə uyğunlaşmaq məcburiyyətində qalmasıdır.
Google Sites
Report abuse