Nasdaq yeni zirvədə – bazarda qarışıq bağlanış 

ABŞ fond bazarlarında cümə günü qarışıq mənzərə müşahidə edildi. S&P 500 indeksi sessiyanı düz xəttin bir qədər aşağısında yekunlaşdırdı. Dow Jones isə 273 punkt (≈0,7%) geriləyərək ardıcıl artım trendini qırdı. Əksinə, texnologiya şirkətlərinin üstünlük təşkil etdiyi Nasdaq 100 yeni tarixi zirvələrə yüksəldi.

İnvestorlar yumşaq əmək bazarı göstəricilərini və inflyasiyanın aşağı enməsini Federal Ehtiyat Sisteminin (FED) bu həftə faiz dərəcələrini endirə biləcəyinə dair siqnal kimi şərh etdilər. Hazırda bazarlar 17 sentyabr iclasında FED-in 0.25 faiz endirimini yüksək ehtimalla qiymətləyir, yarım bəndlik (0.50%) kəsinti ehtimalı isə nisbətən aşağı görünür.

Texnologiya sektorunda yüksəliş 

Nasdaq indeksi gün ərzində 0.4% bahalaşdı. Tesla səhmləri 7.4%, Microsoft isə 1.7% dəyər qazanaraq ümumi texnologiya sektorunu qaldırıb. "Microsoft"-un AB-nin potensial antiinhisar cəriməsindən yayınması xəbəri də əhval-ruhiyyəni gücləndirdi. Bu arada texniki və istehlakçı yönümlü səhmlər ön plana çıxsa da, xammal və səhiyyə sektoru geridə qalıb. 

Həftəlik nəticələr  

• S&P 500: +1.6% (avqustun əvvəlindən bəri ən yaxşı həftəlik göstərici)

• Nasdaq: +2% (üç həftəlik ilk artım)

• Dow Jones: +1.1% (üç həftəlik ilk qazanc)

Texniki baxış: mümkün korreksiya  

Analizlərimizə əsasən, Nasdaqın yeni tarixi zirvəsi 24 142 punktda formalaşmış müqavimət səviyyəsinə toxundu. Bu səbəbdən indeksin qısamüddətli korreksiya ehtimalı yüksək qiymətləndirilir. Bundan sonra 24 000 punkt dəstəyi də aşağı qırılarsa, eniş 23 808 punktadək dərinləşə bilər.

Bu baxımdan investorlar yaxın günlərdə həm FED-in qərarını, həm də Nasdaqın önəmli səviyyələrdə davranışını diqqətlə izləyəcəklər.